અમેરિકન અધિકારીઓના હવાલાથી સીએનએનના એક અહેવાલમાં કહેવામાં આવ્યું છે કે રશિયાએ 2022માં યુક્રેન પર પરમાણુ હુમલો કરવાની યોજના ભારતના કારણે રદ કરી દીધી હતી. રશિયાના રાષ્ટ્રપતિ વ્લાદિમીર પુતિને પરમાણુ હુમલાની યોજના ત્યારે બનાવી હતી જ્યારે રશિયન સેનાને એક પછી એક આંચકાઓનો સામનો કરવો પડ્યો હતો.
રિપોર્ટમાં કહેવામાં આવ્યું છે કે વડાપ્રધાન નરેન્દ્ર મોદી અને ચીન જેવા દેશોના હસ્તક્ષેપના કારણે પુતિનને પરમાણુ યોજનાઓ છોડી દેવાની ફરજ પડી હશે. પીએમ મોદીએ હંમેશા રશિયાના રાષ્ટ્રપતિ પુતિન અને અલગ-અલગ રીતે યુદ્ધને તાત્કાલિક બંધ કરવાની અપીલ કરી છે. પીએમ મોદીનું નિવેદન, “આજે યુદ્ધનો સમય નથી” ખૂબ જ લોકપ્રિય બન્યું હતું. ફ્રાન્સના રાષ્ટ્રપતિ ઇમેન્યુઅલ મેક્રોને પણ યુએનના મંચ પરથી પીએમ મોદીના વખાણ કરતા તેનું પુનરાવર્તન કર્યું હતું.
યુક્રેનની સેનાની કઈ કાર્યવાહીથી રશિયા પરેશાન હતું?
રિપોર્ટ અનુસાર 2022માં અમેરિકન અધિકારીઓ ચિંતિત થઈ ગયા હતા જ્યારે તેમને આશંકા હતી કે રશિયા યુક્રેનમાં વધી રહેલા પડકારોને ધ્યાનમાં રાખીને વ્યૂહાત્મક પરમાણુ હથિયારોનો ઉપયોગ કરી શકે છે. આ ત્યારે હતું જ્યારે યુક્રેનિયન દળો દક્ષિણમાં રશિયાના કબજા હેઠળના ખેરસન પર આગળ વધી રહ્યા હતા. અહેવાલ મુજબ, રશિયાને ચિંતા થઈ હતી કે જો યુક્રેનિયન સૈનિકો આગળ વધવાનું ચાલુ રાખશે તો ખેરસનમાં તેના દળોને ઘેરી લેવામાં આવશે અને તેનો નાશ કરવામાં આવશે. યુએસ અધિકારીઓ માનતા હતા કે આવા ભારે નુકસાન ક્રેમલિનને બિન-પરંપરાગત/પરમાણુ માધ્યમોનો ઉપયોગ કરવા માટે પ્રોત્સાહિત કરી શકે છે.
